Lajm i mirë për qytetarët e Kosovës dhe veçanërisht për ata që udhëtojnë drejt Italisë. Nga sot, 8 shtator, është shtuar lidhja direkte ajrore mes Prishtinës dhe Romës, duke krijuar një tjetër mundësi të shpejtë për udhëtime drejt kryeqytetit italian.
Linja e re po operohet nga Wizz Air Malta dhe lidh Aeroportin Ndërkombëtar të Prishtinës me aeroportin Fiumicino të Romës. Fluturimet direkte do të realizohen dy herë në javë, ndërsa udhëtimi zgjat rreth dy orë.
Hapja e kësaj linje pritet të jetë e rëndësishme për qytetarët që udhëtojnë për pushime, vizita familjare apo arsye biznesi, duke shmangur nevojën për fluturime me ndalesa.
Kjo vjen në kuadër të zgjerimit të operimeve të Wizz Air në Prishtinë. Kompania ka paralajmëruar edhe zgjerim të mëtejshëm të rrjetit të saj nga kryeqyteti i Kosovës, përfshirë tre linja të reja që do të nisin në nëntor.
Me këtë zhvillim, Prishtina forcon lidhjet ajrore me destinacione të rëndësishme evropiane, ndërsa udhëtarët kanë më shumë alternativa për të udhëtuar direkt nga Kosova.
Leave a Reply