Kinematografia kosovare po vazhdon të fitojë vëmendje në skenën ndërkombëtare. Filmi “Shame and Money”, me regji të Visar Morinës, ka siguruar të drejtat e shpërndarjes në Amerikën e Veriut përmes kompanisë amerikane Oscilloscope Laboratories.
Filmi, i cili u vlerësua me Çmimin e Jurisë për Filmin më të Mirë në kategorinë World Cinema Dramatic në festivalin prestigjioz Sundance, pritet të ketë një publikim në kinema në Amerikën e Veriut gjatë fillimit të vitit 2027.
Historia ndjek një familje nga Kosova, e cila jeton në kushte të vështira ekonomike në një zonë rurale dhe detyrohet të zhvendoset në Prishtinë pas humbjes së burimit të saj të jetesës.
Përmes kësaj historie, regjisori trajton presionin ekonomik, vështirësitë e jetës së përditshme dhe përpjekjen e një familjeje për të gjetur stabilitet në një mjedis të ri.
Në kastin e filmit janë emra të njohur të aktrimit, përfshirë Astrit Kabashin, Flonja Kodhelin, Kumrije Hoxhën, Fiona Gllavicën dhe Alban Ukajn.
Marrëveshja për shpërndarjen në Amerikën e Veriut përfaqëson një hap të rëndësishëm për filmin, pasi i mundëson atij të arrijë një audiencë shumë më të gjerë përtej festivaleve ndërkombëtare.
Pas suksesit në Sundance dhe vlerësimeve të tjera në festivale, “Shame and Money” vazhdon të forcojë prezencën e kinematografisë kosovare në industrinë ndërkombëtare të filmit.
Leave a Reply