Fshati Lashticë i Gjilanit do të shënojë një nga ngjarjet më të rëndësishme për kujtesën historike, me përurimin e Obeliskut të UÇK-së, një monument kushtuar luftës çlirimtare, dëshmorëve, martirëve dhe të gjithë atyre që kontribuan për lirinë e Kosovës. Ceremonia do të mbahet më 29 korrik 2026, në ora 18:00, ndërsa organizatorët kanë ftuar qytetarët, institucionet, veteranët, familjet e dëshmorëve, mediat dhe mërgatën shqiptare që të marrin pjesë në këtë ngjarje përkujtimore.
Lashtica njihet si një prej fshatrave që ka dhënë kontribut të rëndësishëm në periudha të ndryshme të historisë kombëtare. Banorët e saj kanë qenë pjesë e përpjekjeve për liri në kohë të ndryshme, ndërsa gjatë luftës së fundit në Kosovë dhanë sakrifica të mëdha, me dëshmorë, invalidë lufte dhe shumë familje që përjetuan humbje e vuajtje. Pikërisht kjo histori e qëndresës është arsyeja pse ngritja e këtij obelisku shihet si një akt respekti ndaj brezave që sakrifikuan për lirinë.
Sipas organizatorëve, realizimi i monumentit është bërë falë kontributit të donatorëve nga Lashtica, kompanive dhe bashkatdhetarëve në mërgatë, të cilët kanë mbështetur financiarisht këtë projekt. Përurimi do të shoqërohet me një program artistik dhe koktej për të gjithë pjesëmarrësit, duke e kthyer ceremoninë në një moment bashkimi dhe nderimi për historinë e fshatit dhe të luftës çlirimtare.
Obelisku me tri shkronjat e arta të UÇK-së synon të mbetet një simbol i përhershëm i kujtesës dhe mirënjohjes. Organizatorët theksojnë se monumente të tilla nuk janë vetëm vepra infrastrukturore, por dëshmi për brezat e rinj mbi sakrificën që u bë për lirinë dhe shtetin e Kosovës, duke ruajtur gjallë kujtimin për ata që dhanë gjithçka për atdheun.
Ndërkohë, në të njëjtën mbrëmje në Gjilan zhvillohet edhe manifestimi “Ditët e Mërgatës”, i cili pritet të sjellë një koncert me pjesëmarrje të madhe. Megjithatë, organizatorët e përurimit të obeliskut dhe qytetarë të shumtë bëjnë thirrje që ceremonia në Lashticë të mos anashkalohet apo bojkotohet për shkak të koncertit. Sipas tyre, nderimi i dëshmorëve dhe i historisë së luftës është një detyrim moral e kombëtar, ndërsa pjesëmarrja në këtë ngjarje përfaqëson respekt për sakrificën mbi të cilën është ndërtuar liria e Kosovës.
Leave a Reply