Pak orë para vazhdimit të seancës konstituive të Kuvendit, Lidhja Demokratike e Kosovës po përballet me një përplasje të fortë të brendshme politike.
Kryetari i LDK-së, Lumir Abdixhiku, ka kritikuar disa prej deputetëve të partisë, duke i akuzuar se debati i tyre nuk lidhet vetëm me interesin institucional, por edhe me garën për drejtimin e ardhshëm të LDK-së.
Deklaratat e tij kanë nxitur reagim të drejtpërdrejtë nga deputetja Hykmete Bajrami, e cila e ka cilësuar Abdixhikun si “humbës të trefishtë” dhe e ka akuzuar për përçarje të partisë. Përplasja publike mes drejtuesve dhe deputetëve të LDK-së është zhvilluar kryesisht përmes deklaratave në media dhe rrjete sociale.
Në të njëjtën kohë, ish-kryeministri dhe deputeti i LDK-së, Avdullah Hoti, ka kërkuar që partia të shkojë drejt një konvente ku të përcaktohet ekipi udhëheqës për zgjedhjet e ardhshme. Kjo ka shtuar edhe më shumë diskutimet për të ardhmen e lidershipit të partisë.
Përplasja vjen në një moment veçanërisht të ndjeshëm për LDK-në. Partia ka konfirmuar pjesëmarrjen në seancën e sotme të Kuvendit, por brenda saj ekzistojnë qëndrime të ndryshme rreth marrëveshjes me Vetëvendosjen.
Gjashtë deputetë të LDK-së – Avdullah Hoti, Hykmete Bajrami, Kujtim Shala, Janina Ymeri, Armend Zemaj dhe Arben Gashi – kanë dalë kundër marrëveshjes me LVV-në për kandidaturën e Bekim Sejdiut për president.
Kjo situatë mund të ndikojë edhe në zhvillimet institucionale që priten pas konstituimit të Kuvendit.
Sot, vëmendja është te salla plenare, por paralelisht me votimet pritet të vazhdojë edhe beteja politike brenda LDK-së.
Leave a Reply