“Kosova po pret” – sot Prishtina mbushet me qytetarë për “Marshin për Liri”

Sot, Prishtina pritet të jetë në qendër të vëmendjes, pasi në kryeqytet mbahet “Marshi për Liri”, organizuar nga platforma qytetare “Liria ka Emër”. Marshi nis nga ora 14:00 në sheshin “Skënderbeu” dhe zhvillohet në prag të shpalljes së aktgjykimit në Hagë për ish-krerët e UÇK-së. 

Në fokus të këtij organizimi janë Hashim Thaçi, Kadri Veseli, Jakup Krasniqi dhe Rexhep Selimi, ndërsa motoja e marshit është “Kosova po pret”. Organizatorët kanë bërë thirrje për pjesëmarrje të gjerë qytetare, duke e cilësuar marshin si një aktivitet për të shprehur mbështetje, drejtësi dhe dinjitet. 

Për organizimin e sotëm janë bërë thirrje të shumta gjatë ditëve të fundit. Në mesin e figurave publike që kanë ftuar qytetarët të marrin pjesë janë edhe artistë të njohur, ndërsa Dafina Zeqiri i është bashkuar thirrjeve vetëm një ditë para marshit. 

Një pjesë e veçantë e programit pritet të jetë edhe muzika. Shkurte Fejza dhe Arif Vladi janë paralajmëruar si performues në këtë organizim, duke i dhënë marshit edhe një dimension emocional e simbolik. 

Marshi zhvillohet vetëm pak ditë para 16 shtatorit, kur pritet të shpallet vendimi në rastin ndaj katër ish-krerëve të UÇK-së. Për këtë arsye, organizatorët presin pjesëmarrje të madhe dhe kanë bërë thirrje që qytetarët të mblidhen sot në Prishtinë.