“Marshi për Liri”, i mbajtur sot në Prishtinë në mbështetje të Hashim Thaçit, Kadri Veselit, Jakup Krasniqit dhe Rexhep Selimit, ka marrë vëmendje të gjerë mediatike në rajon dhe jashtë Kosovës.
Marshimi, i organizuar nga platforma “Liria ka emër”, u zhvillua në prag të vendimit të Dhomave të Specializuara të Kosovës në Hagë, i cili pritet të shpallet më 16 shtator. Në Prishtinë u mblodhën mijëra qytetarë, ndërsa pjesëmarrës pati edhe nga Shqipëria dhe diaspora.
Pamjet nga sheshi “Skënderbeu”, pankartat dhe pjesëmarrja masive kanë qarkulluar në raportime mediatike, ndërsa marshimi është trajtuar edhe nga media jashtë Kosovës. Një raportim në gjuhën angleze e përshkruan tubimin si një mobilizim të madh të Kosovës në mbështetje të ish-krerëve të UÇK-së, katër ditë para vendimit në Hagë.
Mesazhet e pjesëmarrësve u përqendruan te drejtësia, liria dhe mbështetja për ish-krerët e UÇK-së. Në mesin e pankartave u panë edhe mesazhe si “Nuk ka paqe nëse vendimi sjell padrejtësi” dhe “Kur preket UÇK-ja, ngrihemi të gjithë”.
Sipas platformës “Liria ka emër”, rreth 100 mijë qytetarë morën pjesë në marshim, shifër e dhënë nga organizatorët. Policia e Kosovës njoftoi se protesta përfundoi pa incidente dhe në mënyrë paqësore.
Marshimi vjen në një moment të rëndësishëm për çështjen e ish-krerëve të UÇK-së, pasi më 16 shtator pritet vendimi i Gjykatës Speciale në Hagë.
Leave a Reply