Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, është takuar ndaras me kryeministrin e Kosovës, Albin Kurti, dhe presidentin e Serbisë, Aleksandar Vuçiq, në New York, në kuadër të Asamblesë së Përgjithshme të Kombeve të Bashkuara.
Pas takimeve, Kallas tha se në fokus ishte nevoja për përparim në normalizimin e marrëdhënieve mes Kosovës dhe Serbisë.
“Përparimi në normalizim dhe përparimi në rrugën drejt BE-së duhet të ecin paralelisht”, shkroi Kallas në një deklaratë të publikuar në rrjetin X.
Ajo theksoi se marrëveshjet e arritura përmes dialogut të ndërmjetësuar nga BE-ja, përfshirë marrëveshjet e lidhura me procesin e normalizimit, duhet të zbatohen.
Sipas Kallas, zbatimi i marrëveshjeve nuk duhet të shihet si një favor ndaj Brukselit, por si obligim ndaj qytetarëve dhe rajonit.
Gjatë takimit me Kallas, Kurti kërkoi gjithashtu që BE-ja të ushtrojë presion ndaj Beogradit për ekstradimin e personave të dyshuar për përfshirje në sulmin e Banjskës. Kurti shprehu edhe shqetësimin e tij lidhur me vendimin e Gjykatës Speciale ndaj ish-krerëve të UÇK-së.
Nga ana tjetër, Vuçiq tha se në takimin me Kallas kishte insistuar veçanërisht në zbatimin e marrëveshjeve të Brukselit dhe në themelimin e Asociacionit të Komunave me Shumicë Serbe.
Kallas përfundoi mesazhin e saj me një thirrje të drejtpërdrejtë: “Është koha për të ecur përpara”.
Leave a Reply