Policia e Kosovës ka publikuar raportin 24-orësh për ngjarjet e regjistruara në vend, ku janë evidentuar dhjetëra aksidente trafiku dhe raste të ndryshme që janë trajtuar nga autoritetet.
Sipas raportit, gjatë kësaj periudhe në Kosovë janë regjistruar gjithsej 56 aksidente trafiku. Prej tyre, 26 aksidente kanë qenë me persona të lënduar, ndërsa 30 të tjera kanë shkaktuar vetëm dëme materiale.
Përveç aksidenteve, policia ka bërë të ditur se gjatë kësaj periudhe janë arrestuar 14 persona për raste të ndryshme. Pesë persona janë dërguar në mbajtje, dy të tjerë në ndalim policor, ndërsa një person po vuante dënimin.
Në kuadër të kontrolleve në trafik, policia ka shqiptuar edhe 2 mijë e 126 tiketa për shkelje të ndryshme të rregullave të komunikacionit.
Raporti përfshin edhe disa raste të tjera të trajtuara nga policia. Ndër rastet e raportuara janë një sulm ndaj një polici jashtë detyrës në Gjilan pas një mosmarrëveshjeje në trafik, raste që lidhen me armë dhe disa raste të dhunës në familje.
Po ashtu, në Lipjan është raportuar një zjarr që ka shkaktuar dëme materiale, ndërsa autoritetet janë duke punuar për të sqaruar rrethanat e rasteve të raportuara.
Policia vazhdon t’u bëjë thirrje qytetarëve, veçanërisht shoferëve, që të respektojnë rregullat e trafikut dhe të kenë kujdes gjatë drejtimit të automjeteve, me qëllim shmangien e aksidenteve dhe pasojave të rënda.
Leave a Reply