Kuvendi i Kosovës ka arritur ta zgjedhë Presidenten e re, duke shmangur kështu një tjetër krizë institucionale dhe mundësinë e shkuarjes së vendit në zgjedhje të reja parlamentare.
Në një seancë të jashtëzakonshme të zhvilluar në orët e vona të 6 tetorit, Justina Shiroka-Pula u zgjodh Presidente e Republikës së Kosovës me 81 vota, në raundin e parë të votimit.
Zgjedhja e saj erdhi vetëm pak para përfundimit të afatit kushtetues. Nëse Kuvendi nuk do të arrinte të zgjidhte Presidentin brenda afatit, vendi do të përballej me mundësinë e një tjetër cikli zgjedhor.
Shiroka-Pula, e cila ka drejtuar Akademinë e Shkencave dhe Arteve të Kosovës dhe është ekonomiste, u bë Presidentja e tretë grua e Kosovës. Kandidatura e saj u mbështet nga Lëvizja Vetëvendosje dhe Partia Demokratike e Kosovës.
Pas zgjedhjes, Presidentja e re deklaroi se mandati i saj nuk i përket vetëm një personi, por të gjithë qytetarëve dhe institucioneve të vendit, duke bërë thirrje për unitet.
Zgjedhja e Presidentes i jep fund për momentin një periudhe të gjatë pasigurie institucionale. Kosova kishte kaluar tashmë dy palë zgjedhje të parakohshme dhe një ngërç të gjatë politik, ndërsa moszgjedhja e Presidentit rrezikonte ta rikthente vendin në zgjedhje.
Megjithatë, zhvillimet politike mbeten të ndërlikuara, veçanërisht për shkak të debatit të fundit rreth Dhomave të Specializuara në Hagë dhe protestave që kanë zhvilluar në vend.
Me zgjedhjen e Shiroka-Pulës, Kosova shmang për momentin një tjetër shpërndarje të Kuvendit dhe zgjedhje të reja, duke krijuar mundësi për vazhdimin e funksionimit normal të institucioneve.
Leave a Reply