FC Malisheva i bën ofertë zyrtare Pep Guardiolës, 650 mijë euro pagë vjetore

FC Malisheva ka bërë një lëvizje tejet befasuese në botën e futbollit, duke i paraqitur një ofertë zyrtare trajnerit spanjoll Josep “Pep” Guardiola.

Sipas raportimeve të Indeksonline, oferta është nënshkruar nga zëvendëspresidenti i klubit, Afrim Bytyqi, dhe parasheh një pagë vjetore prej 650 mijë euro bruto për Guardiolën.

Përveç pagës bazë, kontrata e propozuar përfshin edhe bonuse të konsiderueshme, të cilat do të aktivizoheshin në rast të arritjes së objektivave të përcaktuara sportive.

Guardiola, një prej trajnerëve më të suksesshëm në futbollin botëror, aktualisht është një emër i njohur ndërkombëtarisht për punën e tij në nivelet më të larta të futbollit evropian.

Oferta e FC Malishevës ka tërhequr vëmendje të madhe, duke marrë parasysh profilin e trajnerit spanjoll dhe diferencën mes futbollit kosovar dhe klubeve ku Guardiola ka punuar gjatë karrierës së tij.

Mbetet të shihet nëse kjo ofertë do të marrë një përgjigje nga Guardiola dhe nëse kjo lëvizje e pazakontë mund të shndërrohet në një nga historitë më të bujshme të futbollit kosovar.