Prej 26 vitesh jeton në Danimarkë, por lidhjen me Kosovën nuk e ka humbur asnjëherë. Qefsere Ismajli, gjilanasja që ka gjetur në satirë mënyrën për të komentuar zhvillimet shoqërore, politike, kulturore dhe sportive, është bërë një emër i njohur për lexuesit e shkrimeve të saj në rrjetet sociale.
Për Qefsere Ismajlin, rrjetet sociale nuk janë vetëm një hapësirë për të ndarë momente nga jeta e përditshme. Ato janë kthyer në një vend ku ajo shpreh mendimet e saj, vë në pah dukuritë shoqërore dhe i trajton ngjarjet aktuale përmes humorit, ironisë dhe satirës.
E lindur dhe e rritur në Gjilan, ajo jeton në qytetin Vejle të Danimarkës që nga viti 1999, kur u largua nga Kosova në rrethana të vështira, gjatë luftës. Megjithatë, largësia nuk e ka shkëputur nga vendlindja. Përkundrazi, përvoja e mërgimit duket se ia ka shtuar dëshirën për të shkruar për njerëzit, zhvillimet dhe realitetin në Kosovë.
Nga ëndrra për mësimdhënie te satira
Dashuria për fjalën dhe përkushtimi ndaj çështjeve shoqërore kanë rrënjë të hershme në jetën e saj. Qefsere Ismajli kishte përfunduar Shkollën e Lartë Pedagogjike, me dëshirën që një ditë të punonte si mësuese. Mirëpo, rrethanat politike dhe represioni serb i asaj kohe ia vështirësuan realizimin e kësaj ëndrre.
Një ndikim të veçantë në formimin e saj pati edhe babai, Bejtulla Ismajli, mësues dhe ish-kryetar i Komunës së Gjilanit gjatë viteve ’90. Qëndresa e tij në një periudhë të vështirë për shqiptarët e Kosovës la gjurmë në formimin intelektual dhe në raportin e saj me atdheun.
Edhe pse nuk arriti ta ndiqte profesionin që kishte dëshiruar, ajo e gjeti një mënyrë tjetër për t’u komunikuar njerëzve përmes fjalës.
“Ëndrra ime ishte të bëhesha mësuese, t’i edukoj nxënësit ashtu siç i kishte edukuar babai im, por sfidat e jetës dhe represioni serb ma pamundësuan realizimin e kësaj ëndrre”, ka treguar ajo.
Sot, shkrimet e saj synojnë të përcjellin mesazhe te lexuesit, duke i trajtuar temat e ditës në një formë që ndërthur mendimin kritik me humorin.
Satira si mënyrë për ta parë realitetin
Qefsere Ismajli ka rreth një dekadë që merret më seriozisht me satirën. Gjatë kësaj kohe, ajo ka krijuar stilin e saj të të shkruarit, duke u fokusuar në zhvillimet politike, kulturore e sportive, por edhe në sjelljet dhe kontradiktat që vëren në shoqëri.
Përmes fabulave dhe shprehjeve të goditura, ajo synon që lexuesit jo vetëm të argëtohen, por edhe të ndalen për të reflektuar mbi atë që ndodh rreth tyre.
Sipas saj, satira shkon përtej ironisë, pasi synon të nxjerrë në pah problemet dhe të demaskojë dukuri që shpesh kalojnë pa u vënë re. Reagimet e publikut dhe mbështetja e njerëzve kanë qenë një shtysë për të vazhduar këtë rrugëtim krijues.
Në postimet e saj, ajo përdor fjali të shkurtra, por me kuptime të gjera, duke trajtuar përvojat njerëzore, zgjedhjet e jetës, marrëdhëniet mes njerëzve dhe mënyrën se si shoqëria përballet me vështirësitë.
Mesazhe si “më mirë një kthesë me kohë sesa një jetë në drejtim të gabuar” përcjellin idenë se ndryshimi dhe reflektimi janë pjesë e rëndësishme e jetës. Ndërsa vëzhgimet e saj për sjelljet njerëzore shpesh i japin lexuesit arsye për të qeshur, por edhe për të menduar.
Një lidhje që mërgimi nuk e zbeh
Pavarësisht jetës së ndërtuar në Danimarkë, Kosova vazhdon të zërë një vend të veçantë në jetën e Qefsere Ismajlit. Ajo jeton pranë familjes, fëmijëve dhe mbesave të saj, por malli për vendlindjen mbetet pjesë e përditshmërisë.
Për të, atdheu nuk matet me kushtet materiale apo mundësitë që ofron një vend tjetër. Ai lidhet me njerëzit e afërt, miqësitë, kujtimet dhe përvojat që e kanë formuar njeriun.
Këtë ndjenjë ajo e përmbledh me shprehjen: “Balta e vendlindjes është më e bukur se ari i mërgimit”, një fjali që shpreh lidhjen e fortë emocionale me rrënjët dhe vendin prej nga vjen.
Rrugëtimi i Qefsere Ismajlit tregon se largësia nuk e pengon domosdoshmërisht njeriun të jetë pjesë e jetës shoqërore të vendit të tij. Përmes shkrimeve në rrjetet sociale, ajo vazhdon të ndjekë zhvillimet në Kosovë dhe t’i komentojë ato me një stil që ndërthur humorin, kritikën dhe përvojën jetësore.
Nga Gjilani në Vejle të Danimarkës, ajo ka gjetur te satira një mënyrë për ta mbajtur gjallë lidhjen me vendlindjen dhe për t’u përcjellë lexuesve këndvështrimin e saj mbi botën që e rrethon.
Leave a Reply