Komisioni për Integrime Evropiane i Kuvendit të Kosovës ka miratuar planin e punës për sesionin vjeshtor, i cili parasheh takime me përfaqësues të institucioneve të Bashkimit Evropian, raportime të ministrave dhe bashkëpunim me organizatat joqeveritare.
Kryetarja e komisionit, Jehona Lushaku-Sadriu, ka bërë të ditur se gjatë muajit tetor është planifikuar një takim me kryenegociatorin për integrim evropian, Jeton Zulfaj, për të diskutuar zhvillimet e fundit në këtë proces dhe takimet e tij në Bruksel.
Për muajin nëntor, plani parasheh takime me zyrtarë dhe ambasadorë të Bashkimit Evropian, pritjen e delegacioneve dhe bashkëpunimin me Zyrën e BE-së në Kosovë.
Ndërkaq, gjatë muajit dhjetor janë planifikuar raportime të ministrave para komisionit dhe aktivitete të tjera që lidhen me procesin e integrimit evropian.
Gjatë mbledhjes, anëtarja e komisionit, Liza Gashi, ka propozuar që Kosova të shkëmbejë përvoja me Malin e Zi dhe Shqipërinë, dy vende të rajonit që po avancojnë në procesin e anëtarësimit në Bashkimin Evropian.
Sipas propozimit, bashkëpunimi ndërmjet komisioneve përkatëse do të mundësonte diskutimin e përvojave, sfidave dhe praktikave që mund të ndihmojnë në rrugën drejt integrimit evropian.
Plani i punës është mbështetur nga të gjithë anëtarët e komisionit.
Miratimi i këtij plani përcakton aktivitetet e parapara për muajt në vijim, ndërsa përparimi konkret i Kosovës në procesin e integrimit do të varet nga zbatimi i reformave dhe zhvillimet në marrëdhëniet me institucionet evropiane.
Leave a Reply