Pas shumë vitesh të kaluara nën ombrellën e grupit mediatik KOHA, gazetari Enver Robelli duket se ka vendosur të ndryshojë kursin, duke iu bashkuar projektit të ri të Telegrafit në Zvicër. Lëvizja e tij po komentohet në qarqet mediale si një largim simbolik nga media që për vite është perceptuar si e afërt me publicistin Veton Surroi dhe rrethin e tij të ndikimit.
Kalimi i Robellit tek Telegrafi nuk shihet thjesht si një ndryshim profesional, por si një zhvillim që mund të reflektojë edhe ndryshimet e balancave brenda skenës mediale shqiptare. Telegrafi, i udhëhequr nga Gentian Lluka dhe i lidhur me biznesmenin Ekrem Lluka, prej kohësh ka qenë rival i drejtpërdrejtë i grupit KOHA, duke ndërtuar një qasje krejt tjetër në raport me publikun dhe ndikimin mediatik.
Zgjerimi i Telegrafit në Zvicër po bëhet përmes një partneriteti me kompaninë Plan B Creative në Cyrih, që drejtohet nga aktori Ridvan Murati. Ky i fundit, përveç angazhimeve në seriale dhe projekte artistike, është përfolur edhe për përfitime fondesh nga institucionet e Kosovës për organizime kulturore dhe aktivitete në diasporë. Tashmë, me hyrjen e Robellit në këtë projekt, duket se synimi është krijimi i një platforme më agresive mediale për tregun shqiptar në Zvicër.
Prania e Robellit si autor dhe konsulent në këtë iniciativë po shihet si përpjekje e Telegrafit për t’i dhënë projektit kredibilitet intelektual dhe peshë publike. Megjithatë, kritikët vlerësojnë se kjo lëvizje mund të interpretohet edhe si afrimi i figurave të njohura të gazetarisë me qendra të reja ekonomike e mediale, në një kohë kur gara për ndikim në diasporë po bëhet gjithnjë më intensive.
Në promovimin e projektit në Cyrih u panë së bashku Gentian Lluka, Ridvan Murati dhe Enver Robelli, duke sinjalizuar një aleancë të re në tregun medial shqiptar. Nën sloganin e afrimit me diasporën, Telegrafi synon të depërtojë më fuqishëm tek shqiptarët në Zvicër dhe Evropë, duke trajtuar tema të integrimit, kulturës dhe suksesit të mërgatës. Por përtej retorikës publike, lëvizja e Robellit po shihet si një goditje simbolike për grupin KOHA dhe një mesazh se rivalitetet mediale shqiptare po hyjnë në një fazë të re.
Leave a Reply