23 korrik 2026 – Një vendim i fundit i gjykatës britanike ka shkaktuar debat të gjerë në Mbretërinë e Bashkuar, pasi shqiptari Dardan Hoxhaj, i dënuar më parë për trafik droge, është lejuar të qëndrojë në vend pavarësisht urdhrit për deportim. Rasti është komentuar gjerësisht në mediat britanike dhe ka rikthyer në qendër të vëmendjes politikat e emigracionit.
Sipas dokumenteve gjyqësore, Hoxhaj hyri ilegalisht në Mbretërinë e Bashkuar në vitin 2017. Më pas ai u dënua me tre vjet burg për përfshirje në një rrjet të trafikut të drogës me vlerë rreth 750 mijë paund. Në vitin 2018, ai u deportua në Shqipëri, por vetëm një muaj më vonë u rikthye ilegalisht në Britani.
Vendimi i gjykatës u publikua më 18 korrik 2026. Gjatë shqyrtimit të çështjes, gjyqtarët morën parasysh gjendjen shëndetësore të bashkëshortes së Hoxhajt, e cila vuan nga PTSD kompleks, ankthi dhe depresioni, si dhe faktin se ai kujdeset për të dhe për djalin e tyre. Për këtë arsye, gjykata vendosi se deportimi do të ishte “tepër i ashpër” për familjen dhe rrëzoi urdhrin për largimin e tij.
Rasti ka shkaktuar reagime të forta në Britani. Një pjesë e politikanëve dhe opinionit publik kanë kritikuar vendimin, duke argumentuar se një person i dënuar dhe i rikthyer ilegalisht nuk duhet të lejohet të qëndrojë në vend. Ndërkohë, ekspertët ligjorë theksojnë se vendimi është marrë në bazë të rrethanave familjare dhe të drejtave të njeriut, të parashikuara nga ligji britanik.
Leave a Reply