Prokuroria Speciale e Kosovës, në bashkëpunim me Njësinë e Veçantë Hetimore të Policisë së Kosovës, ka ndërmarrë veprime hetimore që kanë rezultuar me arrestimin e një gjyqtari të Gjykatës Themelore në Prishtinë. Sipas njoftimit zyrtar, A.G. dyshohet për kryerjen e veprës penale “Keqpërdorimi i detyrës zyrtare”.
Hetimi ndaj tij është zhvilluar në mënyrë intensive dhe të vazhdueshme gjatë disa muajve. Prokuroria Speciale thotë se gjatë kësaj periudhe janë siguruar të dhëna dhe prova, mbi bazën e të cilave është vlerësuar se ekziston dyshimi i arsyeshëm për përfshirje në veprën penale.
Autoritetet nuk kanë bërë të ditura detaje të tjera lidhur me veprimet konkrete për të cilat dyshohet gjyqtari, duke theksuar se çështja është ende në fazën e hetimeve. Prokuroria ka bërë të ditur se detajet shtesë nuk mund të publikohen për momentin, me qëllim të ruajtjes së integritetit të procesit hetimor.
Prokuroria Speciale dhe Policia e Kosovës kanë deklaruar se mbeten të përkushtuara në luftimin e korrupsionit, keqpërdorimit të detyrës zyrtare dhe veprave të tjera penale. Ndërkohë, për personin e arrestuar vlen parimi i prezumimit të pafajësisë, deri në një vendim përfundimtar të gjykatës.
Leave a Reply