Aeroportet britanike janë përfshirë nga kaosi pas një defekti teknik në sistemin e kontrollit të trafikut ajror, duke shkaktuar anulime dhe vonesa të shumta. Rreth 1,900 fluturime janë prekur, ndërsa mijëra pasagjerë janë përballur me pritje të gjata dhe ndryshime të papritura të udhëtimeve.
Problemi teknik goditi sistemin e shërbimit britanik të kontrollit ajror NATS, duke shkaktuar ndërprerje në menaxhimin e fluturimeve. Edhe pse sistemi është rikthyer në funksion, pasojat po vazhdojnë pasi kompanitë ajrore po përpiqen të sistemojnë fluturimet, avionët dhe ekuipazhet e mbetura jashtë orarit.
Situata ka prekur disa prej aeroporteve më të rëndësishme të Britanisë, përfshirë Heathrow, Gatwick, Manchester, Stansted dhe Luton. Udhëtarë të shumtë janë detyruar të presin me orë të tëra, ndërsa disa fluturime janë anuluar ose shtyrë.
Kaosi ka shkaktuar edhe reagime të forta nga kompanitë ajrore, të cilat kanë kërkuar përgjegjësi për problemet e krijuara. Drejtuesit e NATS pritet të japin shpjegime për incidentin dhe për masat që do të ndërmerren për të shmangur një përsëritje të tij.
Autoritetet britanike kanë bërë të ditur se sulmi kibernetik është përjashtuar si shkak i incidentit. Ndërkohë, pasagjerëve u është bërë thirrje që të kontrollojnë statusin e fluturimit para se të udhëtojnë drejt aeroportit, pasi vonesat dhe anulimet mund të vazhdojnë edhe gjatë ditës së sotme.
Leave a Reply