Fustani ikonik i zi i Princeshës Diana, i njohur në mbarë botën si “fustani i hakmarrjes”, do të dalë sërish në ankand në dhjetor, gati tri dekada pas shitjes së tij të fundit.
Fustani i mëndafshtë, i dizajnuar nga Christina Stambolian, do të ofrohet nga Sotheby’s në Nju Jork më 9 dhjetor 2026. Vlera e tij është parashikuar mes 150 mijë dhe 300 mijë dollarëve, ndërsa në disa vlerësime kjo arrin deri në rreth 250 mijë euro.
Diana e veshi fustanin më 29 qershor 1994, në një mbrëmje gala të organizuar nga Vanity Fair në Serpentine Gallery në Londër. Pikërisht atë mbrëmje, bashkëshorti i saj i atëhershëm, Princi Charles, pranoi publikisht në një intervistë televizive se kishte qenë i pabesë gjatë martesës së tyre.
Fustani, me shpatulla të zbuluara dhe një prerje të guximshme, u bë menjëherë një prej paraqitjeve më të famshme të Dianës. Ajo kishte blerë dizajnin disa vite më herët, por fillimisht e kishte konsideruar shumë të guximshëm për një paraqitje publike.
Pas veshjes së tij në vitin 1994, termi “revenge dress” u përhap gjerësisht në kulturën popullore dhe fustani u kthye në simbol të vetëbesimit, pavarësisë dhe mënyrës se si Diana kontrollonte imazhin e saj publik.
Fustani ishte nxjerrë në ankand edhe në vitin 1997, në një shitje bamirësie të organizuar nga Diana, ku ajo shiti pjesë të garderobës së saj për të mbledhur fonde. Që atëherë, fustani ka qenë në pronësi private dhe nuk është ofruar në ankand për gati 30 vjet.
Para ankandit, fustani do të ekspozohet në disa qytete, përfshirë Londrën, Hong Kongun dhe Gjenevën, përpara se të mbërrijë në Nju Jork për shitjen e 9 dhjetorit.
Një pjesë e të ardhurave nga shitja pritet të shkojë për NHS Lothian Charity, në mbështetje të Royal Edinburgh Hospital, duke i dhënë kësaj shitjeje edhe një dimension bamirës.
Leave a Reply