Aleanca për Ardhmërinë e Kosovës (AAK) është bërë pjesë e “Marshit për Liri” që po mbahet sot në Prishtinë, në mbështetje të ish-krerëve të UÇK-së që po gjykohen në Hagë.
Përmes një fotografie të publikuar nga partia, përfaqësues të AAK-së janë shfaqur së bashku gjatë pjesëmarrjes në marsh, duke përcjellë mesazhin e tyre të mbështetjes për ish-krerët e UÇK-së.
Në këtë marsh, AAK-ja përfaqësohet edhe përmes kryetarit të saj, Ardian Gjini, i cili është një nga folësit e paralajmëruar në aktivitet. Organizatorët kanë bërë të ditur se Gjini do t’u drejtohet qytetarëve gjatë tubimit.
“Marshi për Liri” është organizuar nga platforma qytetare “Liria ka Emër” dhe në Prishtinë janë mbledhur mijëra qytetarë nga Kosova, Shqipëria dhe diaspora. Tubimi zhvillohet katër ditë para shpalljes së aktgjykimit ndaj Hashim Thaçit, Kadri Veselit, Jakup Krasniqit dhe Rexhep Selimit në Hagë.
Pjesëmarrja e AAK-së në këtë aktivitet vjen në një moment të rëndësishëm për mbështetësit e ish-krerëve të UÇK-së, ndërsa mesazhi kryesor i marshit mbetet kërkesa për drejtësi dhe solidaritet me të akuzuarit në Hagë.
Leave a Reply