Një postim i gjatë, i nënshkruar nga Rilind Geci dhe Gani Geci, ka nisur një valë reagimesh në rrjete sociale, pasi sjell për herë të parë të bashkuara në një vend deklaratat e shtatë ish-krerëve të Shtabit të Përgjithshëm të UÇK-së lidhur me një nga episodet më të errëta e të kontestuara të luftës: origjinën e Komunikatës nr. 59.
Sipas autorëve të postimit, kjo komunikatë ka qenë ajo që e etiketoi Gani Gecin si bashkëpunëtor të Serbisë gjatë luftës, pasojë e së cilës ishin plagosja e tij me pesë plagë, si dhe vrasja e dy personave të tjerë – Besim Dajaku dhe Bekim Kastrati. Për vite me radhë, përgjegjësia për këtë komunikatë ka kaluar nga një emër te tjetri, pa u sqaruar kurrë plotësisht se kush qëndronte pas saj.
Postimi rendit kronologjikisht deklaratat e dhëna ndër vite nga figura qendrore të UÇK-së. Azem Syla, në vitin 2011, pranon se një urdhër i tillë mund të jetë dhënë nga Shtabi i Përgjithshëm, por thotë se nuk i kujtohet saktësisht. Sipas postimit, pikërisht pas kësaj deklarate, Syla dërgoi Hashim Thaçin dhe Kadri Veselin për të takuar familjen Geci në Llaushë, takim ku, thuhet, Hashim Polari i pëshpëriti Gani Gecit se autor i komunikatës ishte Rexhep Selimi.
Tre vjet më vonë, në 2018-ën, Milaim Zeka deklaroi në televizionin T7 se emra si Jakup Krasniqi, Fatmir Limaj dhe Rexhep Selimi e kishin identifikuar Hashim Thaçin si autor të komunikatës së diskutueshme.
Presioni publik arriti kulmin në shkurt të vitit 2019, kur vetë Hashim Thaçi, atëherë President i Kosovës, doli publikisht dhe e quajti Komunikatën nr. 59 “abuzive”, duke i kërkuar ndjesë hapur Gani Gecit dhe familjes së tij për dëmin e shkaktuar. Vetëm dy ditë më vonë, Jakup Krasniqi reagoi ashpër ndaj deklaratës së Thaçit, duke theksuar se asnjë komunikatë zyrtare e UÇK-së nuk ishte lëshuar kurrë me qëllim përçarës apo denigrues ndaj familjeve shqiptare.
Në të njëjtin muaj, Sami Lushtaku – shok lufte i Gani Gecit, por kundërshtar i tij politik – e mbrojti hapur figurën e Gecit, duke e cilësuar komunikatën “gabim” dhe duke rrëfyer se, sipas tij, vetë Hashim Thaçi e kishte pranuar në bisedë private se nuk e kishte urdhëruar ofensivën kundër tij.
Pika kulmore e gjithë kësaj radhe deklaratash vjen në nëntor të vitit 2019, kur Rexhep Selimi thotë hapur, pa asnjë paqartësi: “Komunikata nr. 59 është hartuar dhe lëshuar nga Hashim Thaçi.”
Postimi mbyllet me një pyetje të drejtpërdrejtë drejtuar opinionit publik: mes gjithë këtyre dëshmive kontradiktore, kush janë dëshmitarët e vërtetë të kësaj historie – dhe a duhet konsideruar ata si “spiunë apo heronj”?
Ndërkohë, çështja mbetet e pasqaruar zyrtarisht, ndërsa familja Geci vazhdon të kërkojë përgjigje mbi atë çka e cilësojnë si një nga padrejtësitë më të rënda të luftës.
Leave a Reply