,

Von der Leyen në Prishtinë: “Kosova mund të jetë anëtare e BE-së”

Presidentja e Komisionit Evropian, Ursula von der Leyen, qëndroi sot në Prishtinë, ku u takua me ushtruesen e detyrës së presidentes, Albulena Haxhiu, dhe kryeministrin Albin Kurti. Vizita ishte pjesë e turneut të saj në Ballkanin Perëndimor. 

Në konferencën e përbashkët me Kurtin, von der Leyen tha se e sheh të ardhmen e Kosovës në Bashkimin Evropian dhe theksoi se, si shtet evropian, Kosova mund të bëhet anëtare e BE-së. Ajo shtoi se përparimi drejt këtij objektivi lidhet me stabilitetin institucional dhe zbatimin e reformave. 

Kurti, ndërkohë, kërkoi mbështetjen e saj që Kosovës t’i jepet statusi i vendit kandidat për anëtarësim në BE. Ai tha se Kosova i plotëson kriteret dhe kërkoi që Këshilli i BE-së t’i kërkojë Komisionit Evropian opinionin për aplikimin e Kosovës. 

Von der Leyen gjithashtu u shpreh se stabiliteti institucional është “themeli për gjithçka tjetër”, përfshirë reformat, rritjen ekonomike dhe përparimin në rrugën evropiane. 

Vizita u zhvillua në një ditë kur në Prishtinë pati edhe protesta lidhur me aktgjykimet e fundit të Dhomave të Specializuara në Hagë. Von der Leyen tha se vendimet e gjykatës duhet të respektohen, ndërsa theksoi se asgjë nuk mund ta ndryshojë historinë e Kosovës dhe kujtoi represionin dhe krizën humanitare të vitit 1999. 

Leave a Reply

Your email address will not be published. Required fields are marked *