Presidenti i Shteteve të Bashkuara, Donald Trump, ka ashpërsuar kritikat ndaj presidentit ukrainas, Volodymyr Zelensky, duke deklaruar se ka ardhur koha që Ukraina të zgjedhë një udhëheqës të ri, i cili mund të arrijë marrëveshje për t’i dhënë fund luftës me Rusinë.
Deklaratat e Trumpit, të bëra të shtunën, më 10 tetor, kanë nxitur reagime në Ukrainë dhe te aleatët evropianë, duke shtuar tensionet mes Uashingtonit dhe Kievit në një periudhë kur përpjekjet për paqe vazhdojnë të përballen me pengesa.
“Unë sugjeroj që ata të zgjedhin një udhëheqës të ri që mund të arrijë një marrëveshje, sepse ai mund të kishte arritur shumë marrëveshje, por për disa arsye nuk e bën këtë”, deklaroi Trump, duke shtuar se Ukraina duhet të ketë një president të ri.
Ai e fajësoi Zelenskyn për mungesën e një marrëveshjeje për përfundimin e luftës dhe kritikoi sulmet ukrainase ndaj rafinerive ruse të naftës. Sipas presidentit amerikan, këto sulme po ndikojnë në tregjet e karburanteve dhe po kontribuojnë në rritjen e çmimeve.
Zelensky: Ukrainasit vendosin se kush do t’i udhëheqë
Presidenti ukrainas nuk vonoi të përgjigjej. Në një intervistë për televizionin amerikan ABC, Zelensky theksoi se zgjedhja e presidentit të Ukrainës u takon qytetarëve të saj dhe jo udhëheqësve të huaj.
Ai gjithashtu deklaroi se Ukraina është e gatshme të organizojë zgjedhje nëse Rusia pranon një armëpushim të plotë për 60 ditë.
“Ju lutem, tregojini Putinit: na jepni dy muaj, 60 ditë armëpushim të plotë, dhe ne do t’i organizojmë zgjedhjet”, tha Zelensky, duke e lidhur mundësinë e zgjedhjeve me krijimin e kushteve të nevojshme të sigurisë.
Zgjedhjet në Ukrainë nuk janë mbajtur gjatë luftës për shkak të gjendjes së jashtëzakonshme, e cila kufizon organizimin e tyre. Kjo çështje është përdorur vazhdimisht nga Moska për të vënë në pikëpyetje legjitimitetin e vazhdimit të mandatit të Zelenskyt.
Leave a Reply