Inspektorati i Mjedisit ka shqiptuar një gjobë prej 5 mijë eurosh ndaj Drejtorisë së Inspekcionit të Komunës së Prishtinës, për shkak të moskryerjes së detyrave dhe përgjegjësive ligjore që lidhen me menaxhimin e mbeturinave vëllimore dhe deponive të dheut.
Lajmi është bërë i ditur nga ministrja e Mjedisit, Fitore Pacolli, e cila ka njoftuar se gjatë kontrolleve janë konstatuar mbeturina vëllimore jashtë hapësirës së përcaktuar për deponim, në deponinë e dheut të ndërmarrjes publike lokale “Gjelbër” dhe në zonat përreth saj.
Sipas njoftimit, problemi ishte evidentuar edhe më herët, por, pavarësisht paralajmërimeve të përsëritura, nuk ishin ndërmarrë masat e nevojshme për trajtimin e situatës.
Ministrja Pacolli ka theksuar se institucionet publike duhet të japin shembull në mbrojtjen e mjedisit dhe në respektimin e përgjegjësive ligjore. Menaxhimi i duhur i mbeturinave dhe parandalimi i ndotjes mbeten çështje me rëndësi për shëndetin publik dhe cilësinë e jetës së qytetarëve.
Rasti rikthen vëmendjen te përgjegjësia e institucioneve për mirëmbajtjen e hapësirave publike dhe zbatimin e rregullave mjedisore.
Leave a Reply