GODITJE E RE PËR THAÇIN: Prokuroria e Hagës kërkon 6 vjet burgim — vendimi mund t’i shtohet dënimit për krime lufte

Zyra e Prokurorit të Specializuar (ZPS) në Hagë ka bërë sot kërkesën e pritur me ankth në rastin e pengimit të drejtësisë: 6 vjet burgim për ish-presidentin e Kosovës, Hashim Thaçi. Vendimi, nëse aprovohet nga trupi gjykues, do të vuhet në vijim të çdo dënimi tjetër që mund t’i shqiptohet Thaçit në çështjen kryesore për krime lufte, që do të thotë vite shtesë sipër viteve që mund t’i shqiptohen tashmë.

Në fjalën përfundimtare të gjykimit për vepra penale kundër administrimit të drejtësisë, prokurori Joshua Hafetz kërkoi nga Dhomat e Specializuara të Kosovës që të gjithë të akuzuarit të shpallen fajtorë për të gjitha pikat e aktakuzës. Sipas tij, provat e paraqitura vërtetojnë përtej çdo dyshimi të arsyeshëm se veprat e kryera përbëjnë krime serioze kundër drejtësisë. Kërkesat konkrete të Prokurorisë ishin: 6 vjet burgim për Thaçin, nga 3 vjet për Bashkim Smakajn, Isni Kilajn dhe Fadil Fazliun, dhe 9 muaj burgim për Hajredin Kuçin.

Sipas Prokurorisë, çështja nuk është thjesht formale, por bëhet fjalë për përpjekje sistematike për të cenuar procesin gjyqësor. Në incizimet e paraqitura si provë thuhet se Thaçi ka kërkuar korrigjime të hollësishme në deklarata dëshmitarësh, deri në nivel faqeje e rreshti, ndërsa një dëshmitar e ka përfshirë atë në akuza për keqtrajtim të pretenduar. Prokuroria pretendon gjithashtu se materiale konfidenciale të dëshmisë janë gjetur në zotërim të Kilajt, bashkë me udhëzime se si dëshmitari duhej të deponte.

Ky nuk është një proces i izoluar. Vetëm dy ditë pas përmbylljes së këtij gjykimi, Thaçi, së bashku me Kadri Veselin, Jakup Krasniqin dhe Rexhep Selimin, do të dalë përpara trupit gjykues për aktgjykimin kryesor: akuzat për krime lufte gjatë luftës së viteve 1998–99 në Kosovë, ku Prokuroria ka kërkuar 45 vjet burgim për secilin prej tyre.

Nëse të dyja kërkesat e Prokurorisë pranohen, Thaçi mund të përballet me një dënim kumulativ prej dekadash burgim, një skenar që do të shënonte fundin juridik të njërit prej figurave më të njohura të Kosovës së pasluftës. Vendimi final mbetet në duart e trupit gjykues të Dhomave të Specializuara.