Policia e Kosovës ka raportuar për një numër të rasteve kriminale dhe aksidenteve të regjistruara gjatë 1 tetorit në territorin e vendit. Sipas raportit të publikuar sot, gjatë kësaj periudhe janë arrestuar 19 persona, ndërsa 13 prej tyre janë dërguar në mbajtje.
Në mesin e rasteve të raportuara është edhe një vjedhje në Lipjan, ku nga një vinç janë vjedhur kabllo dhe rreth 400 litra naftë. Policia ka nisur hetimet për identifikimin e personave të dyshuar për rastin.
Në Prishtinë janë arrestuar tre persona nën dyshimin për prerje të paligjshme të drurëve, ndërsa është raportuar edhe një rast i sulmit ndaj zyrtarëve policorë.
Raste të posedimit të paautorizuar të armëve janë raportuar në Obiliq dhe Viti, ku policia ka konfiskuar armët dhe ka ndërmarrë veprimet e nevojshme ndaj personave të dyshuar. Në Prizren është raportuar gjithashtu një incident me armë zjarri, por pa persona të lënduar.
Një aksident me fatalitet është regjistruar në Shtërpcë. Përveç tij, policia ka evidentuar 23 aksidente me persona të lënduar dhe 25 aksidente me dëme materiale.
Gjatë së njëjtës periudhë, Policia e Kosovës ka shqiptuar 1,951 gjoba në trafik.
Leave a Reply