Një operacion kërkim-shpëtimi është vënë në lëvizje në brigjet e Nantucket, Massachusetts, pasi autoritetet humbën kontaktin me një avion që po udhëtonte nga Bermuda drejt Bostonit. Në bord ndodheshin gjashtë persona.
Bëhet fjalë për një avion Gulfstream G100, i regjistruar në Kanada dhe i përdorur si ambulancë ajrore nga kompania Latitude Air Ambulance. Sipas operatorit të aeroportit të Bermudës, në bord ishin katër anëtarë të ekuipazhit dhe dy pasagjerë.
Avioni u nis nga aeroporti L.F. Wade International në Bermuda gjatë natës, me destinacion aeroportin Boston Logan International. FAA njoftoi Rojën Bregdetare amerikane pasi humbi kontaktin me avionin në orët e para të së shtunës.
Menjëherë pas alarmit, Roja Bregdetare e SHBA-së angazhoi ekipe ajrore dhe detare për kërkimin e avionit në zonën pranë Nantucket. Në operacion janë përfshirë helikopterë, avionë kërkimi dhe mjete detare.
Raportimet lokale thonë se avioni mund të ketë deklaruar emergjencë para humbjes së kontaktit, por autoritetet kanë theksuar se rrethanat e sakta mbeten ende të paqarta dhe nuk kanë spekuluar për shkakun.
Kërkimet janë ende duke vazhduar, ndërsa autoritetet nuk kanë bërë të ditur gjendjen e gjashtë personave në bord.
Leave a Reply