Kuvendi i Kosovës ka miratuar sot në lexim të parë Projektligjin për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar.
Në votim morën pjesë 91 deputetë, ndërsa 91 votuan pro, pa asnjë votë kundër dhe pa asnjë abstenim. Grupi Parlamentar i Lidhjes Demokratike të Kosovës nuk mori pjesë në votim.
Para votimit të projektligjit, Kuvendi kishte miratuar edhe mocionin për shmangien e procedurave të rregullta, me 90 vota për. LDK-ja nuk mori pjesë në këtë votim. Ky vendim mundësoi që projektligji të trajtohej me procedurë të përshpejtuar në seancën e sotme.
Projektligji ishte përkrahur më herët edhe nga Komisioni për Legjislacion, i cili e miratoi në parim në mënyrë unanime.
Gjatë debatit në Kuvend, kryeministri Albin Kurti deklaroi se ndryshimet po bëhen me nguti dhe se, sipas tij, nuk ka pasur kohë të mjaftueshme për një analizë të plotë juridike. Megjithatë, ai tha se Lëvizja Vetëvendosje do ta mbështesë projektligjin. Kurti gjithashtu theksoi se rruga për kundërshtimin e aktgjykimit të Speciales është procesi i apelit.
Në anën tjetër, kryetari i AAK-së, Ramush Haradinaj, deklaroi se grupi parlamentar i AAK-së do ta mbështesë projektligjin dhe kërkoi që ai të votohet edhe në lexim të dytë gjatë ditës së sotme.
Me votimin e sotëm, projektligji nuk është ende ligj përfundimtar. Ai duhet të kalojë edhe në lexim të dytë për t’u miratuar përfundimisht.
Seanca po zhvillohet në një atmosferë të tensionuar politike, ndërsa jashtë objektit të Kuvendit janë mbledhur qytetarë dhe përkrahës të ndryshimeve ligjore, të cilët kanë kërkuar që procesi të përfundojë me miratimin e plotë të projektligjit.
Zhvillimi i radhës që po pritet është votimi në lexim të dytë, i cili do të përcaktojë nëse ndryshimet do të miratohen përfundimisht nga Kuvendi.
Leave a Reply