Kryetari i Prishtinës, Përparim Rama, ka bërë të ditur se synon të marrë drejtimin e Lidhjes Demokratike të Kosovës (LDK), duke konfirmuar pjesëmarrjen në garën e ardhshme për kryetar të partisë. Krahas kësaj, ai ka kërkuar që udhëheqësi aktual i LDK-së, Lumir Abdixhiku, të largohet nga pozita.
Në një prononcim për media, Rama ka vlerësuar se rezultatet e tij në kryeqytet janë dëshmi e mbështetjes që gëzon, duke theksuar se LDK-ja doli partia e parë në Prishtinë nën udhëheqjen e tij.
Ai ka deklaruar se do të jetë pjesë e garës për kreun e partisë dhe se, sipas tij, Abdixhiku duhet të japë dorëheqje.
Rama u bë pjesë e skenës politike në vitin 2021, kur Abdixhiku e prezantoi si kandidat të LDK-së për kryetar të Prishtinës. Para kësaj, ai njihej kryesisht për karrierën e tij si arkitekt dhe urbanist, me përvojë profesionale edhe jashtë vendit.
Në zgjedhjet lokale të vitit 2021, Rama arriti të fitonte drejtimin e kryeqytetit, ndërsa në vitin 2025 siguroi një mandat të dytë, sërish si kandidat i LDK-së.
Pavarësisht bashkëpunimit politik me këtë subjekt, Rama ka deklaruar në vazhdimësi se nuk është anëtar i LDK-së.
Me shpalljen e kandidaturës dhe thirrjen drejtuar Abdixhikut për dorëheqje, Rama ka hapur një kapitull të ri në garën për udhëheqjen e partisë, zgjedhjet e brendshme të së cilës pritet të zhvillohen vitin e ardhshëm.
Leave a Reply