Lëvizjet e fundit brenda Lidhjes Demokratike të Kosovës po interpretohen si sinjal i qartë se kryetari i Prishtinës, Përparim Rama, po konsolidon një rrjet mbështetës me synimin për të marrë drejtimin e partisë në një fazë të ardhshme politike. Burime të larta brenda LDK-së bëjnë të ditur se pakënaqësitë dhe dallimet me kryetarin aktual, Lumir Abdixhiku, janë thelluar muajt e fundit, ndërsa në prapaskenë po zhvillohen takime dhe koordinime me figura të rëndësishme të partisë. Këto pretendime nuk janë konfirmuar publikisht nga palët.
Përparim Rama konsiderohet si një nga figurat më të forta elektorale të LDK-së, pasi arriti ta fitojë Prishtinën në vitin 2021 dhe ta konfirmojë mandatin edhe në zgjedhjet e vitit 2025, duke mbetur i vetmi eksponent i partisë që e ka mbajtur kryeqytetin për dy mandate radhazi. Pikërisht ky kapital politik po shihet nga mbështetësit e tij si argument i fortë për ta projektuar atë në krye të LDK-së.
Sipas të njëjtave burime brenda partisë, raportet mes Ramës dhe Abdixhikut nuk kanë qenë të lehta, me mospajtime rreth mënyrës së udhëheqjes së LDK-së, vendimmarrjes dhe strategjisë politike. Në qarqet e partisë flitet se këto dallime janë bërë gjithnjë e më të dukshme pas zhvillimeve të fundit politike, duke nxitur diskutime për një rikonfigurim të udhëheqjes.
Një nga argumentet që përmendet nga mbështetësit e Ramës është edhe qëndrimi i tij kritik ndaj kryeministrit Albin Kurti. Ata vlerësojnë se Rama ka qenë ndër zërat më të vendosur të opozitës ndaj qeverisë, duke kundërshtuar në vazhdimësi një sërë politikash dhe vendimesh të ekzekutivit, çka sipas tyre e ka profilizuar si një figurë me peshë në kampin opozitar.
Nëse këto zhvillime do të konkretizohen në një kandidaturë zyrtare, LDK-ja mund të përballet me një garë të fortë të brendshme për drejtimin e saj. Për momentin, gjithçka mbetet në nivel diskutimesh dhe burimesh të brendshme, ndërsa mbetet të shihet nëse Përparim Rama do ta formalizojë ambicien për ta marrë timonin e partisë në periudhën që vjen
Leave a Reply